САЙН ЗУРШИЛУУД

Оюуны цангаагаа тайлцгаая

no_email@coo.mn (7zurshil) — Thu, 29 Apr 2010 15:37:00 +0800

7 Зуршил номоос..

“Манлайлах Урлаг төв” анх хэдэн хүний санаачлагаар хэдэн онд байгуулагдсан вэ? 2006 онд "Өсвөр насныхны дээдэлж мөрдөх 7 зуршил" номыг орчуулагч 6 залуугийн санаачлагаар байгуулагдсан юм. Энэхүү номыг зохиолч Шонн Кови аавынхаа "Үр бүтээлтэй хүний 7 хэвшил" номын ерөнхий санааг өсвөр үеийн залууст тохирох үг хэллэг, жишээ түүх, зураг болон гайхалтай ишлэлүүдээр баяжуулан бичсэн нь дэлхий дахины өсвөр насныхны үнэт туслагч ном болсон бөгөөд өнөөг хүртэл дэлхийн 20 гаруй хэлнээ орчуулагдаж 4 сая гаруй борлогдсон ном юм. Монгол хэл дээрх анхны хэвлэл нь 2006 онд өсвөр насныхан, оюутан залуусын гар дээр очиж байсан бөгөөд нэмж сайжруулсан 2 дах хэвлэл нь 2010 онд нээлтээ хийлээ.

"Үр бүтээлтэй хүний 7 хэвшил" ном нь 1989 онд анх хэвлэгдсэн ба өнөөг хүртэл дэлхийн 38 орны хэлнээ орчуулагдан 15 гаруй сая хувь борлогдоод байна.Түүний номыг зөвхөн уншаад зогсохгүй олон байгууллага, хамт олон тусгайлан байгууллагынхаа дотоод сургалт болгон ашигладаг ба зохиолч ч өөрийн зөвлөгөөний төвөө байгуулан амжилттайгаар номоо дэлхий дахинд түгээсээр байна. Монгол хэлнээ албан ёсоор 2010 онд "Үр бүтээлтэй хүмүүсийн 7 хэвшил" нэртэйгээр хэвлэгдээд байна.

Бид дээрх 2 номоо албан ёсны эрхтэйгээр буюу Fгаnklin Соvеу компанийн зөвшөөрлөөр олны хүртээл болгож байгаа ба Монголын өсвөр үе, оюутан залуус, ажил эрхлэгч, бизнесийн үйл ажиллагаа явуулагч хэнд ч зайлшгүй хэрэгтэй үнэт туслагч нь байж чадах ном гэдгийг батлахын хамт энэхүү ном танай байгууллагын ажилчид, оюутан сурагчид улмаар үр хүүхэд, найз нөхөд, хайртай хүмүүстээ заавал хүргээсэй гэж хүсч байна.

1. Товч агуулга

Өсвөр насныхны дээдэлж мөрдөх 7 зуршил Хүн бүр өсвөр насыг тойрч биш туулж гардаг гэдгийг өгүүлэх боловч зүгээр нэг туулж өнгөрөх биш тэд өдөр бүр ямар зуршил өөхшүүлж, ямар дадлыг хуримтлуулж байгаагаараа ирээдүйгээ бүтээж байгааг нь уншигч хэнбугайд ч ойлгомжтой энгийн үгээр бичжээ.
Өөрөөр хэлбэл: хүний амьдралын үнэ цэнийг өсвөр нас хэрхэн тодорхойлдгийг маш тодорхой бодит амьдралаас урган гарсан жишээ түүхүүд дээр тулгуурлан бичсэн ба сонирхолтой зураг, ишлэлүүдээр баяжуулж өгсөн нь хэдэн удаа уншсан ч уйдамгүй, унших бүрдээ шинийг ойлгох гайхамшигтай бүтээл болгож өгчээ.

Үр бүтээлтэй хүмүүсийн 7 хэвшил Өөрийн бодит амьдралаас тулгуурлан гарсан жишээ түүхүүдээр баяжуулан бүх насныханд буюу ялангуяа ажил эрхлэгч, удирдагч, шинийг санаачлагч мөн өөрийгөө өөрчлөхийг хүсэн тэмүүлэгч хэн бүхэнд тохирсон бүтээл болгож чаджээ. Учир нь зарчим бол хэн нэгний арга барилаар таныг амжилтанд хүргэх бус зөвхөн танд л тохирох тэр зуршил, дадлаа өдөр тутамдаа хэрхэн хуримтлуулж улмаар үр бүтээлтэй хүн болохыг зааж өгсөн бүтээл гэж дэлхий нийтэд хүлээн зөвшөөрөгдсөнөөс нь бэлхнээ харж болно.

2. Зохиолчийн тухай

Стефен Кови нь олон улсад хүлээн зөвшөөрөгдөж хүндлэгдсэн манлайлагч, гэр бүлийн эксперт, багш, байгууллагын зөвлөх, манлайллыг зааж сургахын төлөө амьдралаа зориулсан зохиолч юм.

Доктор Кови нь дэлхий нийтэд ихэд талархагдсан хэд хэдэн ном, үүнд 20-р зууны хамгийн нөлөө бүхий бизнесийн зохиолууд дотроо 1-рт, менежментийн нөлөө бүхий 10 номны нэг хэмээн дэлхий дахинаа хүлээн зөвшөөрөгдсөн "Үр бүтээлтэй хүмүүсийн 7 хэвшил" номыг зохиосон юм.
Тэрээр 9 хүүхдийн эцэг, 43 ач зээгийн өвөө бөгөөд Time сэтгүүлийн дэлхийн хамгийн нөлөө бүхий 25 хүний нэгээр шалгарч, дэлхийд алдартай 7-н их сургуулийн хүндэт докторын цолыг хүртсэн байна.
Дэлхийн зах зээлд бат бэх сууриа эзэлсэн олон арван компани, бизнеийн удирдагчид Стефен Ковигийн "Үр бүтээлтэй хүмүүсийн 7 хэвшил" номыг байгууллагынхаа үйл ажиллагааны тогтолцоо болон гүн ухааны хөгжилд гол үүргийг гүйцэтгэсэн хэмээн үздэг ажээ.

Шонн Кови нь Стефен Ковигийн хүү бөгөөд одоо Fгаnklin Соvеу компанийн худалдаа хариуцсан дэд ерөнхийлөгч ба амьдралын ухаанд мэргэшсэн дэлхийн тэргүүлэх хүмүүсийн нэг юм. Тэрээр Харвардын их сургуулийн бизнесийн удирдлагын магистрийн зэрэгтэй төгссөн юм.

Монгол хэвлэлд зориулсан зохиолчийн үгээс

"Амьдралын тань өдөр тутмын луужин болон таны ширээнд байрлах энэхүү ном маань хоёр дах удаагаа хэвлэгдэж байгаад их баяртай байна. Номыг орчуулсан залуусын өнгөрсөн хугацааны тууштай байдал, бүрэн зориулалтыг мэдэх хүнийх хувьд тодорхой хэлж чадах зүйл маань: англи хувилбар дээр илэрхийлсэн санааг маань яг тэр хэвээр нь Монгол хэлнээ унших хэнбугай ч энэ номоос авч чадна." ...

3. Монгол хүмүүсийн номын талаарх сэтгэгдэл

"Өсвөр насныхны дээдэлж мөрдөх 7 зуршил "Яаж хурдан баяжих вэ? яавал хялбар аргаар нэрд гарах вэ? Яаж бусдаас өрсөж ямар нэгэн ашиг олз олох вэ? Гэсэн номуудыг хүмүүс их авдаг. Харамсалтай нь нэг хүний баяжсан аргаар өөр бусад яваад амжилт олох магадлал бараг үгүй шүү дээ. Тиймээс зөвлөмжийн ном уншъя гэвэл яаж өөрийгөө төгөлдөржүүлэх, дотоод ертөнцөө хэрхэн саруулсгах вэ? гэдгээ илүү бодвол хэн хэнд маань чухал. Өсвөр насныхны ширээн дээр ийм ном тавьж буйд нь харин дүү Сайнбаяр болоод түүний нөхдөд талархмаар байна. Гүн овогт Г. Аюурзана Зохиолч, яруу найрагч Зохиолч

Стив Шиндлер нэгэн номондоо: Хүнд амьдралыг нь үндсээр нь өөрчилж чадах ном доод тал нь нэг байдаг гэж бичсэн байдаг. Миний бодлоор 7 зуршил ном таных хувьд тэр ном болж чадна гэдгийг хэлье. Энэ ном бидэнд огт мэдэхгүй далд ертөнцийг таниулахгүй ч өдөр бүр бидний дунд байдаг мэддэг мөртлөө мэддэггүй зүйлсийн талаар ойлгуулах болно. Та зүгээр л уншаад үз. А. Мөнхнаран МУТ-ийн гишүүн, БНХАУ-ын Тианжин хотын СЭЗДС-ийн 2-р дамжааны оюутан

Ээж аав чинь чамд энэ номонд байгаа зүйлсийг өдөр бүр хэлж байдаг. Харин чи энэ номоос тэд яг юун тухай яриад байгааг ойлгох болно. Одоо чамд хэрэгжүүлэх л үлдлээ.
С. Энх-Эрдэнэ АНУ-с

Нийгмийн олон талт харилцаанд хэрхэн биеэ авч явах, суралцах, хүмүүжих, боловсрон гэгээрэх хамгийн нандин, ойр дөхөм аргуудын цуглуулга болсон энэ ном Монголын маань хүүхэд залуусын ширээний ном болно гэдэгт эргэлзэхгүй байна. Цоодолын Хулан яруу найрагч, зохиолч

Миний бодлоор энэ номоос таны олж авах зүйлийг ямар ч сургууль, ямар ч багш яаж ч зааж сургах боломжгүй мэт санагддаг. Учир нь гагцхүү сургууль танд туслахын тулд л байдаг бол "7 зуршил" таныг өөрөө өөртөө туслахад л хэрэг болох чухал зэвсэг. Ц.Даваажаргал, Моханик хамтлагийн дуучин СЭЗДС-ийн Мэдээллийн системийн менежментийн төгсөх ангийн оюутан

“Үр бутээлтэй хүмүүсийн 7 хэвшил” Монголын эзэнт гүрний мөхлөөс ардчилсан Монгол улс урд хожид байгаагүй хөгжлийнхөө дээд оргил руу тэмүүлж явна. Тэр ч утгаараа 21-р зуун бидний шинэ үеийнхнээс өндөр хариуцлага, ёс суртахуун, өндөр бүтээмж шаардаж байна. Аливаа удирдагчийн амжилт нь хувийн зохион байгуулалтаас эхэлдэг. Тэгвэл Монгол залуу хүн бүрийн унших ёстой ном бол Стефен Ковигийн "Үр бүтээлтэй хүмүүсийн 7 хэвшил" ном мөн. Д.Сайнбаяр Гадаадад суугаа Монголчуудын "Цахим Өртөө Холбоо" ТББ-ын ТУЗ-ын дарга, NTV телевизийн бизнес төлөвлөлт, маркетинг хариуцсан захирал

Үнэхээр мундаг ном. Учир нь гэр бүл, ажил амьдралынхаа тэнцвэрийг хэрхэн зөв зохицуулж амжилтанд хүрэх тухай миний урьд өмнө уншиж байсан номуудаас хамгийн системтэй бөгөөд ойлгомжтой ёстой лаг болсон нь энэ ном... Б. Энхболд Монголын хүний нөөцийн академийн захирал

Хүн амжилттай амьдрахад тийм олон зүйл мэдэх шаардлагагүй. Та энэ номыг уншаад хагасыг нь л амьдралдаа хэрэгжүүлж чадвал хоёр дахин илүү амжилтанд хүрнэ гэж би бүрэн итгэлтэй байна. Л. Одсүрэн Камекс ХХК-ийн худалдаа эрхэлсэн захирал

Амжилтанд хүрэх алтан жор гэж байхгүй. Гэхдээ түүнд хамгийн дөхөх нь Стефен Ковигийн энэ номонд багтсан зөвлөмжүүд юм. Б. Нандин-Эрдэнэ СЭЗДС-ийн багш, маркетер

Зуршлыг сонирхохуй-Хамгийн чухлаа эхэнд тавих нь

no_email@coo.mn (7zurshil) — Wed, 03 Mar 2010 18:20:00 +0800

Та аль нь вэ? Дараах 4 төрлөөс өөрийгөө олоорой.

За эхнийх нь...

Өөх, шалгалт маргааш

Найз маань өвчтэй байдаг

Ажилдаа хоцорлоо

Бие даалтаа өнөөдөр өгөх ёстой

MP-ээ эвдэлчихлээ

Эсвэл энэ үү?

Утсаар хэт их ярьдаг

Хүний яриа тасалдаг

Бусдын явдлыг сонирхдог

Бөөн сэтгэлийн дарамт дунд

Аль эсвэл энэ юм болов уу?

Төлөвлөгөө гаргаж, зорилгоо тодорхойлдог

Эссегээ цагт нь бичдэг

Дасгал сургуулилт байнга хийдэг

Харилцаа холбоо тогтоож түүнийгээ хадгалдаг

Амралтаа зохицуулдаг

За тэгвэл энэ л одоо үлдэж байна, тэгэхээр энэ гэсэн үг үү?

Хэт их зурагт үздэг

Эцэс төгсгөлгүй утсаар их ярьдаг

PC-дэх ч үнэхээр гоё шүү

Хааяа гадуур тэнүүчлэх ч зүгээр

Нэг л мэдэхэд цаг дэмий өнгөрсөн байдаг

Аль нь илүү сайн хүн гэсэн үг юм бол оо?

ЭНЭ БОЛ 3 дах нь буюу ЧУХЛЫГ ЭРХЭМЛЭГЧ байлаа.
Та нэгэнт өөрийгөө ийм гэдгийг харсан бол сайн байна, харин та бусад 3-н аль нэг гэж өөрийгөө тодорхойлсон бол хэрхэн ЧУХЛЫГ ЭРХЭМЛЭГЧ болохыг мэдэхийг хүсч байна уу?

Энэ бол Зуршил 3 буюу Хамгийн чухлаа эхэнд тавь юм.

Зуршлыг сонирхохуй-Төгсгөлийг нь төлөвлөж эхэл

no_email@coo.mn (7zurshil) — Tue, 02 Mar 2010 22:50:00 +0800

7 Зуршил номоос..

I. “Та надад эндээс цааш аль замаар явах ёстойг минь хэлж өгөхгүй юу?

“Энэ нь чиний хаашаа явахыг хүсч байгаагаас л шалтгаална даа” гэж муур хариуллаа.

“Хаашаа ч явсан хамаагүй” гэж Алисаг хэлэхэд ,

“Тэгвэл чи аль ч замаар явсан болно” гэж муур хэллээ.

Арай та ийм байдлаар барилга барихын өмнө зургаа гаргадаггүй, бялуу хийхийн өмнө зааврыг

нь уншдаггүй эхэлдэг биш биз.

Энэ бол Зуршил 2 буюу “Төгсгөлийг нь төлөвлөж эхэл” юм.

Зуршлыг сонирхохуй

no_email@coo.mn (7zurshil) — Tue, 02 Mar 2010 22:08:00 +0800

Надад байгаа зүйлс намайг илэрхийлдэг бол

Надад байгаа зүйлс үгүй болбол БИ ХЭН БЭ?

I. Танд ийм зүйл тохиолдвол яах вэ?

· Ажил олдохгүй

· Таны дүү цамцыг чинь хамгийн хэрэгтэй үед өмсөөд явчихсан

· Нэгэн найз чинь таны тухай хов жив хаа сайгүй тарааж байна

· Хэн нэгэн танд элдэв хоч өгсөн

· Эцэг эх чинь ямар ч шалтгаангүйгээр халаасны мөнгө өгөхгүй

· Шалгантандаа уначихлаа

ТА ЯАХ ВЭ?-Сонголт таных

Би оролдоно Би үүнийг хийнэ

Би угаасаа л ийм хүн Би үүнээс илүү сайн хийж чадна

Надад хийж чадах зүйл алга Бүх боломжоо ашиглана

Би тэгэх л ёстой Би сонгох эрхтэй

Би чадахгүй Өөр арга байх ёстой

Чи намайг баллачихлаа Чиний муу зан надад саад болохыг би зөвшөөрөхгүй

Сонгол таных

Энэ бол Зуршил 1 буюу “Проактив бай” –“Идэвхтэй бай” юм.

Дэлхий дээр хоёр төрлийн хүн байдаг

no_email@coo.mn (7zurshil) — Sat, 21 Apr 2007 17:50:00 +0800

Палестинд “Галилейн”, “Сөнөсөн” хэмээх хоёр тэнгис байдаг. Галилейн тэнгис нь маш цэнгэг устай, олон төрлийн загастай билээ. Мөн эрэг дээрх олон төрлийн өвс ургамал энэхүү тэнгисийг чимдэг бөгөөд энэ тэнгис ч тэдгээр ургамал, моддыг тэжээдэг.

...Иордан гол энэхүү тэнгисд цутгадаг юм. Энэхүү голын эрэг хавиар нь олон хүмүүс аж төрж, мөн ан амьтад, араатан жигүүртэн ч олноороо амьдардаг үнэхээр сайхан газар билээ. Иордан гол энэхүү үзэсгэлэнт тэнгисийг дайран өнгөрч Сөнөсөн тэнгист цутгадаг юм.

Гэвч Сөнөсөн тэнгист Галилейн тэнгистэй адил үсрэн цовхчих загас, салхинд хийсэх навчис, шувуудын жиргээн, хүүхдүүдийн инээд хөөр аль аль нь байхгүй. Энэ тэнгист хүн амьтан ирдэггүйн учир нь энд ямар ч амьдрал байдаггүй.

Энэ зэргэлдээ хоёр тэнгисийг юу ийм их ялгаатай болгодог вэ?

Иордан гол аль алинд нь сайн ус цутгадаг, тэдгээр тэнгисийн байрлаж байгаа газар ч бас гол шалтгаан биш.

Хамгийн гол ялгаа бол эхний тэнгис Иордан голыг хүлээн аваад өөртөө байлгаад байдаггүй. Иордан голоос орж байгаа ус болон гарч байгаа ус нь тэнцүү хэмжээтэй байдаг.

Харин нөгөө тэнгис нь орж ирсэн усыг хадгалаж өөр тийш гаргадаггүй юм. Эхний тэнгис өөрийн усыг байнга сэлбэдэг тул цэнгэг устай хэвээр оршин тогтнодог. Харин энэ тэнгис өөрөөсөө дусал ч ус гаргаж сэлбэдэггүй. Магадгүй үүнээс ч болж түүнийг Сөнөсөн тэнгис хэмээн нэрлэсэн болов уу.

Энэ дэлхий дээр хоёр төрлийн хүн байдаг. Палестинд хоёр өөр тэнгис байдаг билээ.

Бага ч гэсэн эелдэг бай

no_email@coo.mn (7zurshil) — Mon, 09 Apr 2007 18:55:00 +0800

“Хэрэв та сэтгэлээр унасан бол хэн нэгний төлөө ямар нэгэн сайн зүйл хийх нь хамгийн зөв арга юм.” гэж нэгэн сэтгэл зүйчийн хэлснийг би санаж байна. Яагаад? Яагаад гэвэл энэ нь таны гуниг гутралыг дотогш нь бус гадагш нь гаргаж, өөр зүйлд анхаарлыг тань хандуулдаг. Та хэн нэгэнд тусалснаар танд ямар ч гуниглах цаг зав гарахгүй. Бусдад тусалсны ачаар танд маш их гайхалтай мэдрэмж төрөх болно.

Би нэгэн удаа нислэгээ хүлээгээд нисэх онгоцны буудлын хүлээлгийн танхимд сууж байлаа. Миний сэтгэл маш их хөдөлж байсан. Яагаад гэвэл би 1-р зэрэглэлийн тасалбар авсан байсан юм. 1-р зэрэглэлийн суудал нь том, хоол нь аятайхан, үйлчлэгчид нь эелдэг. Онгоцны хамгийн сайхан суудал болох 1А минийх байв. Онгоцонд суухын өмнө би хэдэн цүнх гартаа барьсан, бас дээр нь хүүхэд тэвэрсэн нэгэн эмэгтэйг харлаа. Би тэр үед хэрхэн эелдэг байх тухай бичсэн нэг номыг дөнгөж уншиж дуусчхаад байж байтал гэнэт миний толгойд тэр эмэгтэйд тусалж, түүнд тасалбараа өгөх санаа орж ирлээ. Гэхдээ миний суудал үнэхээр сайхан суудал байсан болохоор энэ бодолтойгоо эвлэрэхийг хүссэнгүй. Гэсэн ч би төдөлгүй түүн дээр очлоо.

“Өршөөгөөрэй, надад байгаа 1-р зэрэглэлийн тасалбарыг надаас илүү та ашигласан нь дээр юм шиг санагдлаа. Хүүхэдтэй нисэхэд ямар хэцүү байдгийг би мэднэ. Тиймээс намайг энэ тасалбараа солихыг минь зөвшөөрнө үү?” гэхэд тэрээр надад үнэхээр их талархаж, бид тасалбараа солилцлоо.

Би онгоцондоо ороод, түүнийг 1А суудалд суухыг нь харахад надад маш сайхан мэдрэмж төрсөн. Миний сольж авсан 24В суудал тийм ч муугүй санагдлаа. Нислэгийн үед сониуч зан минь хөдлөж, түүний яаж явж байгааг харахаар 1-р хэсэг рүү очлоо. Тэд маш тухтай унтаж байхыг нь хараад би үнэхээр агуу, гайхалтай мэдрэмжийг мэдэрсэн юм. Тэгээд би ахин ийм зүйлийг хийж байхаа өөртөө амлалаа.

дэлхий ертөнцийг өөрчлөе гэвэл...

no_email@coo.mn (7zurshil) — Tue, 03 Apr 2007 22:27:00 +0800

Би бага балчир, хүсэл мөрөөдөлд минь

хязгаар үгүй байхдаа,

дэлхий ертөнцийг өөрчлөхийг хүсдэг байлаа.

Би өсөж том болох тусам ухаан сууж,

дэлхий ертөнц өөрчлөгдөхгүй болохыг ухаарлаа.

Ингээд би өөрийн хүсэл мөрөөдлөө

багасган зөвхөн улс орноо өөрчилөхыг хүссэн боловч

энэ нь ч мөн бүтэшгүй болохыг ойлгов.

Би нас ахин,

эцсийн ганц зорилго болох

өөрийн гэр бүлийнхнийгээ өөрчлөхийг

хичээсэн боловч хэнийг нь ч өөрчилж чадсангүй.

Харин одоо, орондоо үхлээ хүлээгээд

энэ бүх өөрчлөлтийг

зөвхөн өөрөөсөө эхэлсэн бол би

гэр бүлээ, дараа нь эх орноо

өөрчлөх байснаа ойлголоо.

Хэн мэдэхэв, би дэлхий ертөнцийг

өөрчлөх ч байсан юм билүү

Эд зүйлст тулгуурласан хэв маяг

no_email@coo.mn (7zurshil) — Mon, 26 Mar 2007 15:49:00 +0800

Зарим үед бид ертөнцийг өмч хөрөнгийн ба “эд зүйл”-ийн линзээр хардаг. Бид “Хэн хамгийн их эд баялагтай үхэж буй нь хождог” гэж сургадаг материаллаг ертөнцөд амьдарч байна. Бидэнд аз жаргал, баяр баяслыг авчрах мэт санагддаг хамгийн хурдан машин, чамин дэгжин хувцас, гоёмсог том бөгөөд хамгийн сүүлийн үеийн хөгжим гэх мэтчилэн бусад олон эд зүйлс нь бидэнд байх ёстой гэж боддог.

Эд хөрөнгө заримдаа цол хэргэм болон үүрэг ролийн нэгэн хэлбэр болдог. Жишээ нь, хамгийн сайн хөгжөөн дэмжигч, оюутны зөвлөлийн гишүүн, хамгийн үнэ цэнэтэй тоглогч г.м.

Иймээс бид эд зүйлсдээ сэтгэл хангалуун явах нь буруу биш юм. Харин бид амьдралаа аливаа зүйлсийн төв болгож болохгүй. Яагаад гэвэл эдгээр зүйлс нь үүрд үнэ цэнээ хадгалаж чаддаггүй. Бидний итгэл аливаа зүйлийн гадаад төрхнөөс бус дотоод мөн чанараас, бидэнд хэдий хэмжээний эд зүйлс байгаагаас бус бидний зүрх сэтгэлийн гүнээс гарах хэрэгтэй. Энэ бүхний эцэст, хэн хамгийн их эд баялагтай үхэж байна... Тэр үхэх л болно.

Би амьдралдаа урьд өмнө нь хэзээ ч харж байгаагүй гоё дэгжин, үнэтэй хувцас өмсдөг нэгэн эмэгтэйг таньдаг байсан юм. Тэр хааяа л нэг өмссөн хувцасаа дахин өмсдөг байв. Би түүнтэй арай дотно болсныхоо дараа нэгэн зүйлийг анзаарсан минь, тэр хэн нэгэнтэй ярилцаж байх үедээ тухайн хүнийхээ хувцасыг доороос нь дээш нь яг л “Цахилгаан шат” мэт сонжин хардаг. Ингэж сонжин харахдаа цаад хүн нь өөр шиг нь сайхан хувцаслаагүйд түүний сэтгэл амардаг байв. Түүний энэхүү эд зүйлст тулгуурласан хэв маяг нь миний урмыг хугалсан юм.

Миний уншсан нэгэн сайхан ишлэлийг би танд сонирхуулъя. “Хэрэв надад байгаа зүйлс намайг илэрхийлдэг бол, Надад байгаа зүйлс үгүй болбол Би хэн бэ?”

7 Зуршил номоос..

үзэл бодлын хязгаарлагдмал байдлаас зайлсхий !!

no_email@coo.mn (7zurshil) — Mon, 19 Mar 2007 10:10:00 +0800

Хэв маяг гэж юу вэ?

... Нэгд, ямар ч зүйл байгаагаараа л байх ёстой. Хоёрт, Хэдийгээр эдгээрийг хэлсэн хүмүүс түүнийгээ үнэн гэж баталдаг ч үнэн хэрэгтээ энэ нь ташаа ойлголтууд байдаг.

Өөрөөр хэлбэл ойлголт бол хэв маяг. Таны ямарваа нэгэн зүйлийг хэрхэн тусгаж авч байгаа, үзэл бодол, сүсэг бишрэл зэрэг нь таны хэв маяг болдог. Хэрэв та ганц л зүйлд туйлширч, түүнийгээ өөрийн баримтлал болговол энэ нь таны үзэл бодлыг хязгаарлагдмал байдалд хүргэдгийг анзаарсан байх. Тухайлбал та өөрийгөө хэзээ ч коллежид орж чадахгүй гэж боддог бол Птолемэйгийн ”дэлхий бол ертөнцийн төв” гэж баталсан нь буруу байсныг санахад илүүдэхгүй биз ээ.

Хэрэв “Би хойд эцэгтэйгээ хэзээ ч таарахгүй” гэж боддог охины энэ бодол нь түүний хэв маяг бол тэр охин хойд эцэгтээ дасах болов уу? Үгүй л байх, учир нь охины энэ баримтлал түүнийг хязгаарлаж байна.

Хэв маяг бол яг л нүдний шилтэй адил. Таны амьдралыг үзэх үзэл болоод өөрийн хэв маяг чинь буруу бол энэ нь өөртөө тохироогүй нүдний шил зүүсэнтэй адил юм. Ингэснээр та бүх зүйлийг байгаагаар нь харж чадахгүй. Хэрвээ та өөрийгөө сонсгол муутай гэж боддог бол та цаашид өөрийгөө дүлий гэж өөхшүүлсээр л байна. Хэрвээ та эгчийгээ дүлий гэж боддог бол та эгчийгээ дүлий байлгах шалтаг хайна. Улмаар эгч чинь таны хувьд дүлий хэвээрээ л үлдэнэ.

Түүнчлэн та өөрийгөө ухаантай гэж бодвол таны хийж буй үйлдэл бүр гарцаагүй зөв мэт санагдана.

Нэгэн удаа Кристи гэгч охин хараагаа шалгуулахаар өөрийн эмчид очоод түүний хараа өөрийнх нь бодож байснаас ч илүү муу байсныг мэджээ. Ингээд тэр шинэ линз зүүснийхээ дараа өмнөхөөсөө илүү сайн харж байгаадаа гайхширав. Шилээ зүүсний дараа түүнд уулс болон модод урьд өмнө нь харагдаж байгаагүйгээр илүү тод, сайхан харагджээ. “Би байгалийн сайхныг ингэж сайн харахаасаа өмнө өөрийн нүдээ хичнээн муу байсныг мэддэггүй байжээ” гэж тэр хэлэв. Бид өөрсдийн дутагдалтай хэв маягийг өөрчлөхөөс нааш хичнээн их зүйл алддагаа мэддэггүй.

Бидэнд өөрсдөдөө,бусдад болон амьдрал хандах хэв маягууд бий. Одоо эдгээрийг тус бүрд нь авч үзье.....

7 Зуршил номоос..

бэрхшээлд ялагдах уу, бэрхшээлийг ялах уу? ... яаж?

no_email@coo.mn (7zurshil) — Sat, 17 Mar 2007 20:17:00 +0800

..... Магадгүй зуршил танд энгийн л нэг зүйл мэт санагдаж байгаа байх тийм үү? Гэхдээ та тэдгээрийн ямар их хүчирхэг болохыг мэдэх болно. .....

харин эхлээд хэсэг залуусын өөрсдөд нь тохиолдсон бэрхшээлүүдээс хуваалцъя:

“Амьдралд хийх зүйл олон байдаг ч хангалттай цаг хугацаа байдаггүй. Надад сургууль, гэрийн даалгавар, ажил, найз нөхөд, үдэшлэг, гэр бүл гээд амжуулах ажил маш их. Надад үнэхээр хэцүү байдаг, би яах вэ? Туслаач!”

“Би өөртөө хэрхэн таалагдах вэ? Хаа ч явсан би өөрөөсөө ухаантай, царайлаг эсвэл илүү нэр хүндтэй нэгнийг олж хардаг бөгөөд “Хэрэв надад түүнийх шиг сайхан үс, гоё дэгжин хувцас, эелдэг сайхан зан чанар, найз залуу байсансан бол би ч жаргалтай байхсан“ гэж бодох юм.

“Миний амьдрал ямар ч жолоодлогогүй мэт санагддаг.”

“Миний гэр бүл бол миний зовлон. Хэрэв би тэднээс тусдаа амьдардагсан бол би өөрийнхөөрөө л амьдрах байсан. Тэд намайг үргэлж өөлж голдог бөгөөд би тэдний сэтгэлд нь нийцдэггүй юм шиг санагддаг.

“Би өөрийн амьдрах замаар амьдрахгүй байгаагаа мэддэг. Би архи, хар тамхи, садар самуун гэх мэт бүхий л муу зүйлд татагдаж байна. Би найз нөхөдтэйгээ байх үедээ тэдний хийж байгаа зүйлийг хийхээс өөр аргагүй болдог.”

“Би хоолны дэглэм барьж эхэлсэн. Энэ бол энэ жилийн миний 5 дахь оролдлого. Би үнэхээр өөрчлөгдөхийг хүсч байна. Гэвч би энэ бүгдийг хэрхэн зохицуулах аргаа олоогүй. Шинээр хоолны дэглэм барьж эхлэх бүрд л надад турна гэсэн итгэл найдвар дүүрэн байдаг. Гэвч энэ нь удаан үргэлжилдэггүй. Ингээд л би ахин сэтгэлээр унаж эхэлнэ.”

“Би одоохондоо санаандаа хүртэл сайн сурч чадахгүй байгаа. Хэрэв би сайн дүн авч дүнгээ ахиулахгүй бол хэзээ ч коллежид орж чадахгүй.”

“Би маш хувирамтгай бөгөөд сэтгэл санаагаар унахдаа амархан. Үүнийгээ давахын тулд юу хийхээ сайн мэддэггүй.”

Эдгээр асуудлууд амьдралд байдаг бодит бэрхшээлүүд юм. Харин та эдгээр бэрхшээлээс зугтаж чадахгүй. Би тэгэхийг ч зөвлөхгүй, харин үүний оронд танд тэдгээр бэрхшээлээ даван туулахад чинь туслах хэдэн арга замуудыг хэлж өгье. Энэ бол Өсвөр Насныхны дээдэлж мөрдөх 7 Зуршил буюу өөрөөр хэлбэл, аз жаргалтай, амжилт дүүрэн амьдарч буй дэлхийн олон олон залуусын мөрддөг 7 зан чанар юм.

Зуршил 1: Идэвхтэй бай

Өөрийн амьдралдаа үүрэг хариуцлагатай ханд.

Зуршил 2: Бодолдоо төгсгөлтэй эхэл

Амьдралынхаа арга барил, хэтийн төлөвөө тодорхойл.

Зуршил 3: Чухал ажлаа эхэнд тавь

Ажлаа эмхэлж хамгийн чухал зүйлээ эхэнд тавь.

Зуршил 4: Хожил-Хожил бод

Хүн-бүр-хожино гэсэн хандлагатай бай.

Зуршил 5: Эхлээд бусдыг ойлгохыг эрмэлз,

Дараа нь өөрийгөө ойлгуул

Бусдыг сэтгэлээсээ сонс.

Зуршил 6: Синержайз

Илүү амжилтанд хүрэхийн тулд хамтдаа ажилла.

Зуршил 7: Хөрөөгөө хурцал

Өөрийгөө байнга шинэчил.

Эдгээр зуршлууд нь хоорондоо уялдаа холбоотой юм. Зуршил 1, 2, 3 нь дотоод үзэл бодлоо шинэчлэх буюу бид үүнийг “Хувийн Ялалт” гэж ойлгож болно. Зуршил 4, 5, 6 нь хамт олны харилцаа холбоог сайжруулах буюу бид үүнийг “Нийтийн Ялалт” гэж нэрлэе. Та багийнхаа сайн тоглогч болохын тулд өөрийнхөө хувийн тоглох чадвараа хөгжүүлэх хэрэгтэй. Тийм учираас “Хувийн Ялалт”-ыг “Нийтийн Ялалт”-ын өмнө тавьж байгаа юм. Харин сүүлийн зуршил болох Зуршил 7 нь шинэчлэлийн зуршил юм. Энэ нь бусад 6 зуршлаа тэжээж байдаг.